مدونة همس الكلمات للشاعر محمد جوده

    عم قناوي   
عم قناوي لم عياله
وشد رحاله
ونوي يبحِّر عاالمحروسة
جايب زاده معاه وزواده
والقُفَّة بالخير متروسة
أصل حجازي بلدياته
من كام يوم 
شيع له جواب 
قال ياقناوي جنبي عمارة
  صاحبها بيسأل علي بواب
نطيت انت قوام في دماغي
يمكن ليك هنا لقمة عيش
جاب لولاد والحُرمة معاه
 وساب بلده وقفــــل الدوَّار
وولاد عم قناوي صغــــار
تشبه ملامحهم بكَّــــــــار 
مقدرشي يسيبهم في الدَّار 
أصله صعيدي جد ومجدع
وعنده نخوه من الأحرار
وجه البيه إداله مفتاح 
لأوضة وصالة قٌصاد السلم
يسكن فيــــــها مع الأولاد
جريت ياسمين بنته وقالت
دي يابوي حٌق ومتسيعناش
وبسلامتها كانت بتـــــــودع
 في أواخر أيـــــام  طفولتها
ودا كان باين علي ضفيرتها
وفي خدها كان طبع الحُّسن
بيبان لو طلعت ضحكـــتها
وابن البيه كان نازل صدفة
عجبته أوي ضحكة ياسمين
وقوام حط عليــــها العين
وعشانها بنت وغلبـانة 
فكر ينصــــب ليها كمين
قال لامها ماما بتندهلك 
دي جايبالك حاجة تخصِّك
وانت ياعم قناوي اتفضل
ورقة وقايمة بالطلبات 
روح هاتهم والباقي عشانك
يمكن بيتك لزمٌه حاجات
عم قناوي خد ولده معاه
لجل ما يتأخر ع البيه
قفلت ياسمين بابها ودخلت
قالت هقعد جوه اذاكر
وم الشباك نطلها الفاجر
حاولت تفتح بابها وتهرب
كان حزمها مابين دراعاته
وكتم صوتها وشاف نزواته
وسرق أغلي ماليها ف لحظة
وطلع من نفس الشباك 
ورجع تاني العــــم قناوي
ولقي الدنيا عليه مقلوبة
ياسمين بنته خلاص انتحرت
بالبنزين وماتت محروقه
علشان تمحي العار عن ابوها
قالوا دي كانت جوه المطبخ
فجأه سمعنا صوتها بتصرخ
وانفجرت فيها الأنبوبة
واهي أعمار ياقناوي مكتوبة
دفن العم قناوي ياسمين 
ودفن قلبه كمان وياها 
وبعد حوالي عشر أيام 
صحي قناوي صراخ الناس
الحق داالمصعد فيه ماس
وابن البيه محجوز جــواه 
هيموت ولوحده ياولـــداه
وانفجر المصعد في ثواني
ومات ابن البيه الجاني
علشان داالعـــدل الرَّباني
وخلَّص حق  قناوي  الله