مدونة همس الكلمات للشاعر محمد جوده

حكاية شلة بنات

تعالوا نشوف أحوال الدنيا
ويا شهنده وماجي ودنيـــا
ودي كلها شلة سبور
قالت نانسي لدنيا ومــــاجي
بكرة انا هاجي ، وجاي ويايا
شــــــاب مودرن من الوراق
ومعــــــاه شلة لطيفة خفيفة
جاي ويـــــــــاهم  واد مغرور
ودا اسمه بهاء
شايف نفسه وحاسس إنه
مالك الدنيا علشان عنده 
في شرم الشيخ أربع شاليهات
وانا عن نفسي بكل صراحة
مش برتاحله ولا طيقـــــاه
نطت ماجي وقالت وااااااااو
حلوة يابيبي  قبل مااشوفه 
اخترت نصيبي
ومن دلوقتي 
معاكم العلم إن انا حجزاه
تاني يوم نادت نانسي شهنده
تعالي ياشهنده أتاري شهندة
غرقت ورا أشجار التوت
ويا صاحبها مبسوطه بيه
وهو كمان  كان بيها مبسوط
لمحت نانسي ساعتها المنظر
رجعت دوغري ومش معقول 
تقطع خلوتهم
ويوم الحد اتقابلت ماجي
ويا صاحبنا الشاب اياه
قام فرَّجها علي شاليهاته
ونازل شَعره كان علي عينه
مغطي جبينه رفعت إيدها 
البنت الحلوة وزاحت شَعره
وقوام جت العين في العين
هيه عنيها كانت في عنيه
بتقرا رسايل حب جميلة 
كان مكتوبه برمش عنيها
أما عينيه كات علي مفاتنها
ومال بشفايفة علي شفايفها 
وبعد حرارة القُبلة الأولي
شدِّت نفسها من أحضانه
وقالت بهدوء بعد مافاقت
لاء يابهاء كده ميصحِّش
إحنا دا إيه اللي عملناه؟
مالت تاخد الشنطة وتمشي
ومتعدلتشي إلا علي الكارثة
اللي في لحظة خانها شيطانها
سلبها الشاب الحلو شرفها
قامت غرقت وسط دموعها
وراحت تحكي لباقي الشِّلَّة
عن عملتها قاموا قالولها
 الحال من بعضه
وبقت الكارثة الواحده كوارث
وتاهت نانسي  في دنيا تانيه
وقلب شهنده يموت في الثانية
مليون مرة من عملتها 
رجعت ماجي تاني تقول
عندي ليكم حل ومعقول
خلاص ياجماعة الطب اتقدم
والمقطوع يرجع موصول
دا مفيش حل غير  الترقيع
يلا بسرعة بينا نتصرف 
قبل ما خبر الكارثة يشيع
وسعتها صورتنا تكون وحشة
وكل الأحلام منا تضيع
واتفتحت أُوضة العمليات 
وبالجنيه كله بيمشي
وكل الشلة رجعوا بنات 
وأهاليهم نايمة علي ودانها
لا فيه رقابة ولا متابعات 
وجعت قلبي ساعتها الآه
وبقيت أدعي في الصلوات
أستر يارب علي بناتنا
واكفينا شر اللَّعنات
محمد جوده