متتغروش في ضحكتنا

متتغروش في ضحكتنا

سيبونا باللي جـــــوانا

سيبونا نعيش بأوهامنا

خيال مرسوم علي هوانا

في دنيا لحد دلوقتي

مانعرف ليه معاندانا

ساعات نِحِس أيامها

بلون الورد والياسمين

ونتخيل إننا فيها

في العز والهنا عايشين

ونرسم كل أحلامنا

في لوحه تشبه البساتين

يفوَّقنا صوت الأشباح

اللي رسمها لينا الخوف

كلام من غير نقط وحروف

وليل ماشي وكله كسوف

وفجر تقيلة خطواته

بشكل غريب ومش معروف

نعيد الكَرَّة من تاني

نلاقي الدنيا وخدانا

مكان تاني وناس تانية

نقول يمكن هنا أحسن

نلاقي حد يفهمنا

يحس مرة بألامنا

نرجع تاني كالعادة

من مطرح ما ابتدينا

نردد في أغاني الحزن

بضحكة حسرة في عنينا

نشوف الخلق حوالينا

بيحكوا عن سعادتنا

وهاتك ياحسد فينا

ودول أصلا ميتعاتبوش

عشان بياخدوا بالظاهر

وشافوا بس مافهموش

وألف مرة قولنالهم

ياللي بتغنُّوا سيرتنا

متتغروش في ضحكتنا

سيبونا باللي جوانا

سيبونا نعيش بأوهامنا

خيال مرسوم علي هوانا

في دنيا لحد دلوقتي

مانعرف ليه معاندانا

مانعرف ليه معاندانا

قصيدة

بقلم الشاعر ..محمد جوده

١سحر الهادى

تعليقان