وعرشته بعيدان البوص
وكل عود م التاني سايب
والف شق في كل حيطه
وكل شق سكناه عقارب
لكن مابينا عشرة سنين
مع بعض شفنا العجايب
حياه بتوصفها البساطه
في اللمه وزيارة القرايب
حياه ماتضيع فيها علاقه
ولاتفرق مابينهم مصايب
يتلموا تحت ضي القمر
يتسلوا في قعدة مصاطب
عشرة كوتشينه ومين يوزع
ومين اللي بات عنده الشايب
ويوم مانقول احنا سهرنا
كان تبقي 11 يا حبايب
نسمع ادان الفجر نصحي
نصلي فرض الله بفرحه
وندعي وفي صلاة الفجر
يرزقنا راحة بال وصحه
الفلاح علي ارضه يمشي
والعامل علي شغله يسعي
ويفضي البيت ع الولايا
بين الخبيز وبين الرحايا
وبين بوشه رسم الهباب
علي جسمها بلون السواد
رسم بساطة ناس وطيبه
النار علي خدودهم خجل
والكحل في عيونهم رماد
الضحكه طالعه من قلوب
تحسها في موسم حصــاد
حتي الجيران كانت بيوتهم
علي بعضها من غير ببيبان
لونها كان وردي وابيض
زي قلوب الناس زماااااان
قلوب تنورها المحبه
تشيل سواد الليل بنورها
ولقيتني سرحان مع قلمي
وقلبي اتوجع من ألمــــي
علي كل شئ فينا اتغيــــر
وفجأه وانا بكتب حروفي
ملا السواد كل المكان
قطعت وفجأه الكهربا
وانا مع القلم سرحان
بس القلم لسه بيكتب
بحروف جميله منوره
بنور ايماني برب الكون
رب المشارق والمغارب
ولما الناس قرت كـــلامي
قالوا مجنون وقالوا شارب
قالوا معتوه وعقلي غايب
بيقول كلام من الغرايب
قولت لو كان ده حكمكم
علي حقايق مش عجايب
اتمني ان اعيش حياتي
وعمري حتي لو ثواني
بعقل غايب عن عالمكم
حتي لوسكران وشارب
#للشاعرالمعاصرمحمدجوده
ليست هناك تعليقات:
إرسال تعليق