سكيتش غنائي

للشاعر / محمد جودة

بنت المنصورة

دخلت لي البت علي مسينجر

وقالت هاااااااااااي هاااااااااي

لو مش مشغول بينا نتعــرَّف

عاالفيس وكواي

انا اسم الشهرة بتاعي هايدي

والأًصلي ريماس

وانت اسمك إيه بقي ياحليوة

وياسيد الناس

وبسرعة جريت علي صفحتها

موزة وأمورة يخرب بيتها

قولت لازم أعرف حكايتها

دا مفيش ولا واحدة في حلاوتها

كاتبة انها بنت المنصورة

ومنزلة يجي ألفين صورة

وصورها علي الصفحة كتيرة

أشكال والوان

وتحس انها بنت أكابر

أو م الأعيان

ولقيتها بتعمل حركات

تبعتلي قلوب مع لايكات

وتقول لي مبتردش ليه

هو انا معجبشي الباشوات؟

قولت لها العفو ياسلطانة

داانتي برنسيسة

دوبتي قلوبنا التعبانة

وسَنَتْها كبيسة

الإسم الأًصلي بتاعي عزت

ودلع متولي

م البيت للجامع وف حالي

وبصوم وبصلي

وحداني ومقطوع من شجرة

ودي عيشتي تمللي

ولقيتها بعتالي أيموشن

وشفايف مضمومة بـ بوسة

وقالت لي البوسة اهداء مني

ولطمت وقولت ياادي الحوسة

نقضت لي وُضُوِّي

وفي عز ياناس ماانا متعرفت

ألاقيها بتضحك وتظقطط

وتقولي انا دلوعة وهادية

بس اوعي تشبهني بشادية

انا إللي بتشبهني حقيقي

هي الفنانة زبيدة ثروت

سألت وقالت لي الساعة كام

قولت لها تيجي واحدة وخمسة

قالت طب يلَّا افتح كام

قولتها في بالي يادي الوكسة

طب مش تفتحي انتي الأول

نتعرف ونعيد م الأول

قالت لي مش هتصدقني

كاميرة تليفوني مش شغالة

وامبارح كان عند الفنِّي

وعرفت انه اهبل بريالة

يلا افتح بقي انت ياعمري

خلَّصني بقي من دي الحالة

*****

قولت لها طب رني عليَّا

نتكلم صوت

قالت اصل اناعندي السيستم

هنا مش مظبوط

ولقيت دردشة تانية اتفتحت

بفتحها لقيت فيها رسالة

من شات مجهول

بيقول اللي معاك دلوقتي

واللي بتقولك أنا هايدي

متجوزة ومخلفة يابني

وولادها عجول

واللي انت مفكرها دي شابة

دي فوق الستين

وحالا هبعتلك ليها صورة

وأوريك بنت المنصورة

بنت الملاعين

بمجرد ما بعتلي صورتها

وبصِّيت بعيوني علي سحنتها

ولقيتني متنَّح للصورة

كتير يجي ساعتين

اتاريها زهقانة من وحدتها

وبتعيش من تاني مراهقتها

يخرب بيت أم اللي جابتها

مانا كنت قاعد وفـ حالي

دي طلعت لي منين

مانا كنت قاعد وفـ حالي

دي طلعت لي منين

 خلُّوا بالكم من نفسكم 

عرض الرؤى

معدل وصول المنشور: ٥٣

كل التفاعلات:

٥سامى الرمحى فنان، والشاعر بيومى محمد و٣ أشخاص آخرين