كلمة واحدة
كلمة واحدة وباختصار
أمي فرحــة في كل دار
حُضْنْ مَرْسَي للأمَان
يحميني من غدر الزمان
مهما كانت قسوتك
لو يوم بتجرح كلمتك
وانت واخداك عزتك
متقولشي كلمة تبل ريق
قلبها جواه حريق
تطفِّي ناره بالسَّماح
هي حاسَّة بالهوان
مش لاقية جواك الحنان
ولا حاسَّة فيك ذرة أمان
نسِّيتها فرحة الزمان
قلبها عليك انفطر
وانت البعيد قلبك حجر
عايش لنفسك ولهواك
وهي ولا فارقة معاك
وكأنها هيه اللي لازم
تترجي كل يوم رضاك
ياعم فوق بلاش جحود
ماانتاش لوحدك في الوجود
ولا انت عشمان في الخلود
وناسي يوم فيه الحساب
وكل عبد وله كتاب
ياإما حظه في النعيم
ياإما ويلات العذاب
ارجع وسيبك م الشيطان
املا قلب امك حنان
راعي ظروفها وسنها
اطلب رضاها وعفوها
راضيها واسعد قلبها
ومهما يحصل منها
عمرك دا كله حقها
تبوس إديها ورجلها
ما تخش جنة ربنا
إلا برضاها وعفوها
قصيدة لمحمد جوده
من ديوان صمت الحنين
ليست هناك تعليقات:
إرسال تعليق