أيام ما كنا ولاد صـــغار

أيام ماكــنا ولاد صــغار

كانت

أحلامنا بريئة

نبني الشط

بيوت رملة

والموج بيهدها

في دقيقة

أجري وألعب

ولا علي بالي

شيك ع الواطي

وشيك ع العالي

وبنك الحظ

داأجمل لعبة

ياما لعبـناها

في بيت خالي

وان قرَّبت المغربية

نلعب عسكر وحرامية

ونجري ندور

علي بعضينا

ونقلد أبطال السيما

والعشا تدَّن

نجري نروَّح

علشان كنا

نخاف م الضلمة

وامي تولع

لمبة جاز

تبعد عنا

شر العتمة

وتمر الأيام

واحنا بنكبر

والألعاب

حوالينا تطوَّر

راحت أيام

شيك ع العالي

لقينا

بليستيشن وأتاري

وألعاب

إنترنت فلاش

بابجي وجاتا

وألعاب تانيه

ساعتها عقولنا

كانت فاضية

ولا شايلين مسئولية

أكل وشرب

وجري ونوم

ودي

حياتنا الطفولية

واما كبرنا

الحال اتغير

لقينا حوالينا

دنيا جديدة

دنيا الكدب

فيها الأكتر

والصدق بقي

حالة فريدة

ناس وشوشهم

غير قلوبهم

ونفاق وطباع

حتي غريبة

ساعتها قلبي

ملاه الخوف

من اللي شفته

ولسه هشوف

لما الناس مات

فيها إحساسها

وضمايرهم دفنوها

في كهوف

خلُّوا الدنيا

فساد وعذاب

وفي وشنا

قفلوا الأبواب

دخلت أُوضتي

وانا بعيط

من دنيا

مليانه ذئاب

وفجأة لقيت

قدام عينيا

شريط أيامي

وانا صغير

تسيل دمعتي

ابكي أكتر

علي الزمان

اللي اتغير

وقولت بيني

وبين نفسي

يارتني

فضلت صغير

==========

قصيدو اـ محمد جوده

من ديون صمت الحنين

٣صلاح ابو عافيه وادى، إسلام محمد يوسف وشخص آخر