بحور الحزن
وشق الحزن علي خدي
بحور تجري فيها الأحزان
عيون تاهت في دنيتـــــها
ودبلت حتي نظــــــــرتها
وروح الفرحــــة هجرتها
في دنيا راح فيها عمري
سراب عدي كأنه ماكـان
****
وكان دا ليه من الأول
يزورنا الحــــزن ويطوِّل
وكاس المـــــر يسقينا ؟
تضيع منَّـــــــا أمانينا
ولا حدش حاسس بينا
دِبِل ورد الصِّبـــــا فينا
وبهتت في وشنا الألوان
****
وفجأة يغيب أعز ما ليك
ولا يفكر في لحظة فيك
يشوف الحزن مالي عنيك
ولا عايز في يوم يرجع
يلم الشمـــــــل من تاني
ويقفل أبواب الحرمـــان
****
وقلوب بتكويها اللَّوعة
وعيون بتنزف الدمعة
وسط ظلام بدون شمعة
وصرخة من الألم طالعة
وناس تايهة ومش سامعة
صوت حتي خيال كداب
يدي الأمل بنور في مكان
****
تقضل قلوبنا موجوعة
مابين ماضي وبين حاضر
جذور الفرحة مقلوعـــة
وشرايين حب مقطوعة
أهات جوانا مسموعة
وعيون بتبكي طول الليل
من حرقة نار الأشجـــان
*****
وبرغم قسوة الدنيا
عايشين بالأمل فيها
في ساعة حظ متشالة
تبدل حزننــــا أفــــراح
وأخرة صبــــــرنا نرتاح
وفي أدينا نلاقي المفتاح
اللي يغير حيــــــــــــاتنا
ويبعد عننا الأحـــــــــزان
ــــــــــــــــــــــــ
قصيدة بحور الحزن ..للشاعر محمد جوده
من ديوان صمت الحنين برقم ايداع 54139
ليست هناك تعليقات:
إرسال تعليق