تنويه
هذه القصيدة لا تشير إلي أشخاص
أو مؤسسات أو أي جهات بعينها
وإنما هي مكتوبة من وحي الخيال
كتصوير مبسط لما يدور في خيال
الشاعر نقلا عن بعض المجتمعات
شكرا مولانا
شكرا شكــــــــرا يامولانا
علي كل اللي عملته معانا
من أول مابقيـت عمـــدتنا
وقتـلت الأحــلام جــــــوَّانا
شكرا شكـــــــــرا يامولانا
****
شكـرا علي كل اللي عملته
مع كل فقيرراضي بعيشــته
كان همُّه الأكبر قوت يومـه
زوِّدت هموم عمره وهِنْتُــه
شكرا شكـــــــــــرا يامولانا
*****
فيري جوود والله ياعمدتنا
ياللي استكترت علينا قوتنا
مصيت دمنـــا حبــة بحبة
سنة ورا سنة خرَّبت بيوتنا
طيب أخرتك ايه ويـــــــانا
شكرا شكــــــــــرا يامولانا
*****
العيش الحاف مش لاقيينه
والفقر اهو حط علينا عينه
وكأنك سيَّــــــــــاف كاريينُه
يقتلنا ويحيا علي قفــــــانا
شكرا شكــــــــــرا يامولانا
*****
مولانا جــــــاي عامل بحَّــار
ومسِّكنـَّــــاه مركبة بشـراع
عيِّشنا ف ليل مالـــــــه نهار
أتاريـه شيطان ومعاه أتباع
بعد العزة سقــــونا مهـــانة
شكرا شكــــــــرا يامــــولانا
بنحمد ربنـا ليـــل ونهــــــار
إننا من نســـــــــــل الإحرار
مهما تزيد الضغط علينـــــا
والله مارح تفرق ويـــــــانا
شكرا شكـــــــــــرا يامولانا
*****
علي حجرك نيِّمتــــــنا نينِّا
عقبال ما تنول العمــــودية
ونقشت علي إدينا الحنَّــــة
صدقنا وعودك الوهميـــــة
وبقينا ننام ليلنا حـــــــزانا
شكرا شكـــــــــرا يامولانا
******
من يومنا في الخيرعايشين
راضيين بقليلنــا وصابرين
لاسِبْت لنا أخضر ولا يابس
وسايبنا في الكـون تايهيين
وساعات مش بنلاقي عشانا
شكرا شكــــــــــــرا يامولانا
*****
لعنة وجت لنا عالطبــطاب
جايبة معاها مرار وخراب
ولو سألنا مانلقي جـــواب
سفيه وعاالجنبين ســوانا
شكرا شكـــــــــرا يامولانا
******
كفنك والله دا ما له جيوب
عايش تكنز في المــــلايين
شيلتك تقلت كفـــاية ذنوب
يوم الحشر هتهرب فيــــن
دا ربنا بيك والله بــــــــلانا
شكرا شكــــــــرا يا مولانا
*********
قصيدة للشاعر/ محمد جودة
