وكانوا زمان ياأمي
قصيدة للشاعر/ محمد جوده
********
وكانوا زمان بيتسابقوا
علي كلمة حلوة ترضيكي
بنظرة حب في عنيكي
ماهو انتي الحرف والكلمة
وانتي الحضن والضمة
وانتي الصحبة واللَّمة
والجنة تحت رجليكي
*******
وكانوا زمان بيتسابقوا
علي طاعتك علي برِّك
علي دعوة طالعة من قلبك
علي مطرح بيلاقوه جنبك
ولحظة فرح تجمعهم
في حضن بيداوي جراحهم
حب وأمان يفرحهم
ويكونوا عِزوة حواليكي
******
وكانوا زمان بيتسابقوا
علي هدية تكون غالية
لأم حنينة وغالية
ياما داقت عذاب ومرار
وياما في قلبها شايلة
وياما بنفسها ضحت
لجل ما تشوف يوم ولادها
يتحقق حلمها فيهم
تزيِّن عمرها بيهم
ويكونوا بكره عكازها
وضهرها برضو وسندها
***********
دلوقتي ليه بيتسابقوا
علي خداعك علي غشك
علي عصيانك وهجرك
تمر أيام وراها سنين
ولا مرة بيسألوا عنك
قلوب جافية مافيها حنين
يعاملوكي بشكل مهين
وتلقي في الاخر نفسك
مرمية في دار مسنين
************
دلوقتي ليه بيتسابقوا
علي مين فيهم يجافيكي
ومين اللي غدر بيكي
ومين اللي يجيب همُّه
ومشاكله يصبَّها عليكي
ومين اللي نسي فضلك
ونسي تعبك وسهرك
وفي لحظة خلاكي تحسي
إنك عمرك ماربيتي
********
يا كل أم في الدنيا
اعتبريني أنا إبنك
أشيلك بين رموش قلبي
ورهن إشارة من صابعك
واعيش عمري أسير فضلك
واقضِّي عمري وحياتي
يكون عطري جمال سيرتك
وأركع قدام العالم
وابوس إيدك وابوس رجلك
قصيدة لـ الشاعر محمد جوده
عرض الرؤى
